जनकपुर बोल्ट्सका अलराउन्डर मोइन अलीले युवा तीव्र गतिका बलर राहुल यादवमा नेपाली क्रिकेटको भविष्य देखेका छन्।
१६ वर्षीय राहुलको बलिङ शैलीबाट प्रभावित मोइनले उनी भविष्यमा नेपालका अर्का लासिथ मलिंगा बन्न सक्ने सम्भावना औंल्याएका छन्।
उनले भने, 'उनी नेपालका 'मलिंगा बन्न सक्ने सम्भावना छ। उनको बलिङमा रहेको विशेष क्षमता र बलिङ शैलीका राम्रो छ।'
कक्षा ९ मा अध्ययनरत राहुलले जारी नेपाल प्रिमियर लिग (एनपिएल) मा आफ्नो बलिङबाट ध्यान आकर्षित गरिरहेका छन्। बिहीबार काठमाडौं गोर्खाजविरुद्ध उनले चार विकेट लिएपछि उनको चर्चा थप चुलिएको छ।
मोइनले राहुलको बलिङमा रहेको विशेष क्षमता र श्रीलंकाका पूर्व तीव्र गतिका बलर लासिथ मलिंगासँग मिल्दोजुल्दो शैलीको सम्भावनालाई लिएर प्रशंसा गरेका हुन्। मलिंगा आफ्नो विशिष्ट बलिङ एक्सन, तीव्र गति र योर्करका लागि विश्व क्रिकेटमा चर्चित थिए।
रौतहटको चन्द्रपुरबाट क्रिकेट यात्रा सुरु गरेका राहुलले चन्द्रपुर क्रिकेट एकेडेमीमा आफ्नो बलिङ कौशल निखारेका हुन्। जनकपुर बोल्ट्सको ट्यालेन्ट हन्टबाट छनोट भएर टोलीमा स्थान बनाएका उनले कम उमेरमै ठूलो प्रतियोगितामा आफ्नो क्षमता देखाउने अवसर पाएका छन्।
एनपिएलमा कर्णाली याक्सविरुद्धको खेलमा दुई विकेट लिएका राहुलले काठमाडौंविरुद्ध अझ प्रभावशाली प्रदर्शन गरे। उनले चार ओभरमा ३१ रन खर्चिएर चार विकेट लिए।
राहुलले साम हेजलेट, स्मित पटेल, कप्तान करण केसी र मोहम्मद आदिल आलमलाई आउट गरेका थिए। उनको प्रदर्शनका कारण काठमाडौं ११५ रनमै समेटियो। जनकपुरले ११६ रनको लक्ष्य १७.२ ओभरमा दुई विकेट गुमाएर पूरा गर्दै आठ विकेटको जित निकाल्यो।
-1793272645.png)
